ٹورنٹو، 9اگست (یواین آئی) عالمی نمبر ایک آرینا سبالینکا کو یو ایس اوپن سے قبل کینیڈین اوپن کے چوتھے راؤنڈ میں روس کی ایکاترینا الیگزینڈرووا کے خلاف 7-6(3)، 4-6، 6-4سے شکست کا سامنا کرنا پڑا۔16ویں سیڈ الیگزینڈرووا نے تقریباً ڈھائی گھنٹے تک جاری رہنے والے سخت مقابلے میں کامیابی حاصل کرکے کوارٹر فائنل میں جگہ بنالی۔چارمرتبہ گرانڈ سلام خطاب جیت چکیں اور موجودہ یو ایس اوپن چمپئن سبالینکا نے پہلا سیٹ ہارنے کے بعد دوسرے سیٹ میں شاندار واپسی کرتے ہوئے مقابلہ فیصلہ کن سیٹ تک پہنچایا، تاہم آخری سیٹ میں الیگزینڈرووا کے جارحانہ کھیل کا سامنا نہ کرسکیں۔ سبالینکا نے پہلے سیٹ میں ابتدائی برتری حاصل کی، لیکن الیگزینڈرووا نے واپسی کرتے ہوئے سیٹ ٹائی بریک تک پہنچا دیا، جہاں روسی کھلاڑی نے کامیابی حاصل کرکے برتری حاصل کرلی۔دوسرے سیٹ میں سبالینکا نے4-3 کی برتری کے لیے سروس بریک حاصل کی اور بعد میں اپنی سروس برقرار رکھتے ہوئے مقابلہ برابر کردیا۔ فیصلہ کن سیٹ میں الیگزینڈرووا نے اعصاب پر قابو رکھتے ہوئے کھیل جاری رکھا، جبکہ سبالینکا کی غیرضروری غلطیوں کی تعداد بڑھتی گئی۔ میچ میں برقرار رہنے کے لیے4-5 کے اسکور پر سروس کرتے ہوئے سبالینکا نے دو میچ پوائنٹس بچائے ، لیکن تیسری کوشش میں ڈبل فالٹ نے الیگزینڈروواکو فتح دلا دی۔ الیگزینڈرووا نے میچ کے بعد کہا، میں نے ہر پوائنٹ کو اس طرح کھیلنے کی کوشش کی جیسے یہ آخری ہو،کیونکہ ان کے خلاف میچ میں زیادہ مواقع نہیں ملتے ۔کوارٹر فائنل میں الیگزینڈرووا کا مقابلہ یوکرین کی ایلینا سویٹولینا سے ہوگا، جنہوں نے امریکی آٹھویں سیڈ امانڈا انیسیمووا کو 6-2، 6-4 سے شکست دے کر سیمی فائنل میں جگہ بنائی۔
