گال، 15 اگست (ایجنسیز) بھارت نے سری لنکا کے خلاف پہلے ٹسٹ کے ابتدائی دن عمدہ بیٹنگ کا مظاہرہ کرتے ہوئے اپنی پوزیشن مستحکم کرلی۔ ٹاس جیت کر پہلے بیٹنگ کرنے والی ٹیم انڈیا نے سری لنکن بولنگ کا پُراعتماد انداز میں سامنا کیا۔ دیودت پڈیکل نے دباؤ سے بھرپور حالات میں شاندار سنچری اسکور کرتے ہوئے اپنے ٹسٹ کیریئر کی بہترین اننگز کھیلی، جبکہ کے ایل راہول نے بھی 77 رنز کی ذمہ دارانہ اننگز کے ذریعے ٹیم کو مضبوط بنیاد فراہم کی۔ نئی نمبر تین پوزیشن پر بیٹنگ کرنے والے پڈیکل نے نہایت اعتماد کے ساتھ شاٹس کھیلے اور سری لنکن گیند بازوں کو مسلسل دباؤ میں رکھا۔ انہوں نے اپنی سنچری مکمل کرنے کے بعد بھی جارحانہ انداز برقرار رکھا اور 131 رنز پر ناٹ آؤٹ رہے۔ پڈیکل کی اس اننگز میں عمدہ تکنیک اور صبر نمایاں رہا، جس کی بدولت بھارت نے دن بھر سری لنکا کو وکٹوں کے لیے ترسائے رکھا۔ راہول اور پڈیکل کے درمیان اہم شراکت نے بھارتی اننگز کو سنبھالا اور ابتدائی نقصان کے بعد ٹیم کو مضبوط پوزیشن میں پہنچایا۔ تاہم شدید کریمپس کے باعث راہول کو ریٹائرڈ ہرٹ ہونا پڑا۔ ان سے قبل اوپنر یشسوی جیسوال 32 رنز بنانے کے بعد رن آؤٹ ہوگئے۔ بھارتی کپتان شبمن گل نے 16 رنز بناکر آؤٹ ہوگئے۔ دریں اثنا سری لنکا کو فیلڈنگ کے دوران ایک تشویش کا بھی سامنا کرنا پڑا۔ شارٹ لیگ پر فیلڈنگ کرنے والے اوپنر نِشان مدوشکا کو راہول کے ایک شاٹ سے ہیلمٹ پر گیند لگنے کے بعد میدان سے باہر جانا پڑا اور طبی معائنہ کیا گیا۔ سری لنکن ٹیم کے لیے مدوشکا کی حالت اور آئندہ کھیل میں ان کی دستیابی اہم ہوگی۔ سری لنکا کو دوسرے دن نئی گیند اور پچ سے فائدہ اٹھاتے ہوئے بھارتی بیٹنگ کو جلد محدود کرنے کی کوشش کرنا ہوگی، جبکہ بھارت اپنی پہلی اننگز کو مزید بڑے اسکور تک پہنچانے کے لیے پڈیکل اور دیگر بیاٹرز سے بڑی شراکت داری کی امید کرے گا۔
