ٹرمپ نے فوجی طیارے اور بکتربند گاڑیاں مانگ لیں
واشنگٹن 12 اکتوبر (ایجنسیز) پانچ نومبر کو امریکی انتخابات کے قریب آنے اور ایرانی خطرے کے خوف کے ساتھ میڈیا نے رپورٹ کیا کہ ریپبلکن امیدوار ڈونالڈ ٹرمپ کی صدارتی مہم نے فوجی طیاروں اور گاڑیوں کے استعمال کی درخواست کی ہے تاکہ سابق امریکی صدر انتخابی مہم کے آخری ہفتوں میں محفوظ سفر کر سکیں۔ ای میلز کا جائزہ لیا گیا اور واقف لوگوں نے انکشاف کیا کہ ٹرمپ کی مہم نے انتخابی مہم کے آخری ہفتوں کے دوران ان کی حفاظت کیلئے فوجی مدد کی درخواست کی جس میں فوجی طیاروں و بکتر بند گاڑیوں کا استعمال بھی شامل ہے۔ان اقدامات میں ٹرمپ کی رہائش گاہوں اور ریلیوں پر فضائی پابندیوں کو بڑھانا اور سات سوئنگ ریاستوں میں بیلسٹک گلاس لگانا بھی شامل ہے۔یہ درخواستیں حکومتی بریفنگ کے بعد سامنے آئی ہیں جس میں بتایا گیا تھا کہ ایران اب بھی ٹرمپ کو قتل کرنے کی سرگرمی سے منصوبہ بندی کر رہا ہے۔ ان کے مشیر ڈرون یا میزائل سے حملوں کے بارے میں فکر مند ہیں۔
