صدر پوتن کا وزیراعظم مودی سے ملاقات میں تیقن،حکومت ہند نے کئی دیگر مسائل بھی اٹھائے
ماسکو: روس نے اپنی فوج میں کام کرنے والے تمام بھارتیوں کو واپس بھیجنے کا وعدہ کیا ہے۔ یاد رہے کہ پی ایم مودی دو روزہ سرکاری دورے پر روس میں ہیں جہاں پر انہوں نے روس کے صدر ولادیمیر پوتن کے سامنے کئی مسئلوں کو اٹھایا ہے۔ ان میں سے ایک مسئلہ یہ بھی ہے کہ جو ہندوستانی لوگ روسی فوج میں بطور معاون کام کر رہے ہیں ان کو واپس بھارت بھیج دیا جائے۔ دونوں لیڈران کے درمیان اس مسئلے پر اتفاق رائے قائم ہو گئی ہے اور روس جلد ہی اپنی فوج میں کام کرنے والے تمام بھارتیوں کو واپس وطن بھیجے گا۔رپورٹ کے مطابق خیال کیا جاتا ہے کہ وزیر اعظم نریندر مودی نے پیر کی رات روسی صدر ولادیمیر پوتن کے ساتھ غیر رسمی ملاقات کے دوران یہ مسئلہ اٹھایا تھا۔روس اس بات پر راضی ہو گیا ہے کہ وہ اپنی فوج میں شامل تمام بھارتیوں کو واپس بھیج دے گا۔ اس بات پر عمل آوری جلدی ہی کی جائے گی۔ذرائع نے بتایا کہ روس نے اس معاملے پر ہماری درخواست پر اپنی اتفاق رائے ظاہر کی ہے۔ واضح رہے کہ روس۔یوکرین جنگ میں ابھی تک چار بھارتیوں کی موت ہو چکی ہے۔اس سال مارچ میں حیدرآباد کے رہائشی 30 سالہ محمد اسفان نے روسی فوجیوں کے ساتھ خدمات انجام دیتے ہوئے زخموں کی تاب نہ لاتے ہوئے دم توڑ دیا۔ فروری میں، سورت، گجرات کا 23 سالہ ہیمل اشون بھائی سکیورٹی اسسٹنٹ کے طور پر خدمات انجام دیتے ہوئے یوکرین کے فضائی حملے میں مارے گئے تھے۔بہرحال پی ایم مودی جو پانچ سال کے بعد روس کے دورے پر گئے ہیں، اس دورے پر خوشی ظاہر کی ہے اور کہا ہے کہ روس کے ساتھ بھارت کے تعلقات ہمیشہ سے ہی اچھے رہے ہیں اور مختلف شعبوں میں دونوں ممالک مل کر ساتھ کام کریں گے۔
پوتن اور مودی نے ایک دوسرے کی تعریف کی
قبل ازیں روس کے صدر پوتن نے وزیر اعظم مودی کو ماسکو کے باہر ایک رہائش گاہ پر ایک غیر رسمی ملاقات کے دوران دوبارہ وزیر اعظم منتخب ہونے پر مبارکباد دی۔ پوتن نے کہاکہ میں (پوتن) آپ کو دوبارہ وزیر اعظم منتخب ہونے پر مبارکباد دینا چاہتا ہوں۔ میرے خیال میں یہ کوئی اتفاق نہیں ہے بلکہ آپ کی کئی سالوں کی محنت کا نتیجہ ہے ۔مودی نے کہاکہ کسی دوست سے ملنا بلاشبہ بہت خوشی کی بات ہے ۔ آپ نے مجھے اپنے گھر بلایا۔ میں اتنا دلچسپ پروگرام بنانے اور پرتپاک استقبال اور آپ کے الفاظ کے لیے آپ کا شکریہ ادا کرنا چاہوں گا۔ میں بہت مشکور ہوں۔
